പ്രതീക്ഷ ....

ഉറക്കമില്ലാത്ത രാത്രികൾ തന്നു 
പകൽ വീണ്ടും എന്നോട് യാത്ര പറയുന്നു 
ദൂരെ നീ ഉറങ്ങുകയാവും 
നിലാവും ,നനുത്ത കാറ്റും , രാക്കിളിപ്പാട്ടും 
വിടരുന്ന പൂക്കളുടെ ഗന്ധവും 
നിന്നെ പുതപ്പായ് മൂടുകയായിരിക്കും
നിന്റെ സ്വപ്നങ്ങളിൽ
നിന്റെ അരികെ ഞാൻ ഉണ്ടാവുമെന്ന
പ്രതീക്ഷകൾക്ക് കനൽ ജ്വലിപ്പിച്ചാണ് 
ഇവിടെ നരച്ച ,പുക മൂടിയ ആകാശത്തിന് 
കീഴെ ,വരണ്ട പൊടി കാറ്റേറ്റു ,
വിയർപ്പു ഗന്ധം പൊങ്ങുന്ന മണൽക്കുന്നുകളുടെ 
ചരിവുകളിൽ 
നിന്നു പടർന്നു കയറുന്ന ഇരുട്ടിന്റെ 
അറ്റങ്ങളെ ഒരു രാത്രി മുഴുവൻ ഉറങ്ങാതെ 
ഇരുന്നു പകലിനോട് കൂട്ടി കെട്ടുന്നത് .